保誠員工福利 買股有八折

【明報專訊】做老闆要留住員工，唔止最低工資咁簡單，仲要有完善嘅福利制度。保誠（2378）就畀員工折扣買自家股票。香港區行政總裁容佳明話，長期聘用嘅員工可以月供形式八折買保誠股票，供款期3至5年，期滿後可取股票。若到期時碰上經濟不景氣，股價下跌又如何？員工可以取回本金，兼酌量有利息。不過，股價折扣同利息回報會隨時調整。

可以「輸打贏要」

保誠去年5月上市後，掛牌首日收報57.2元，昨日報93.3元，累積升左63％。員工仲可以輸打贏要，股價下跌可以取回本金同利息，至少可以保本。不過，回報最大嘅可能係公司，因為參加計劃嘅員工呢3至5年都唔會走，咁就可以減低流失率啦。

留住員工個人，仲要留住佢哋嘅心。容佳明話公司有培訓員工安排，以前可能搵其他講者教授員工，家就內部培訓，希望配套完善啲。容佳明話香港業務首季表現滿意，詳情要等集團遲啲公布整體業績。佢入行26年，發現投保人心態好唔同，鍾意供款年期短，早啲有錢攞，近排佢哋都推出供款期5年、10年嘅產品迎合市場需要。佢入左保誠1年多，銷售團隊由4200人擴充到5000人，期望今年會有10％以上人數增長。