創興「緊箍咒」 綁埋小股東

【明報專訊】創興銀行（1111）由廖氏家族掌控，但係受家族契約嘅緊箍咒，要賣盤甩手畀外人一啲都唔容易。創興班小股東當然對於呢個限制大為不滿啦，怒轟係家族互相綁死之餘，仲綁死埋小股東！

廖氏第三代家族成員廖駿倫今年1月透過旗下民豐（0279），出資約5億向爸爸廖烈文，買入祖業廖氏集團23％股份實益權益，但其他家族成員不滿，最近仲要向民豐提出以八五折價錢回購呢批股份。

小股東抱怨廖銀無法賣盤

噚日創興同母公司廖企（0194）齊齊搞周年股東大會，創興班小股東開完會後，都不禁吐苦水，話希望創興可以賣盤！廖氏家族捧場客、揸齊廖企同創興股份嘅小股東郭先生話，廖氏家族好保守，「如果佢唔想持有銀行，我贊成以對大家有益嘅價錢賣出去」，不過根據廖氏家族喺1972 年簽署嘅契約，間接限制創興股權外流，「佢唔止家族之間互相綁死，仲綁死埋小股東，就未能發揮創興應有價值同發展。」雖然佢批評家族做法影響銀行發展，但都會繼續長揸，真係癡心！

另一位創興小股東鄧生話，創興家發展有限，好應該放盤走出去，不過佢都撐創興既為家族公司，亦有香港地方色彩，仲讚潮州背景嘅創興「Very good」﹕「唔好話乜乜乜首富，就係好人，錯！一定係由股價決定係咪好公司。」

究竟創興間接控股權由第三代掌控、抑或還原基本步，暫時仲係未知數，創興財務及資金管理處總經理陳凱傑唯有派住定心丸，話家股權變動主要喺母公司嘅控股公司，對創興嘅管理層同日常運作無影響。