王慶自大摩跳槽 到中金做大刁

【明報專訊】成日對住一堆宏觀經濟數據，唔知會唔會好悶？內地市場近日盛傳，現為大摩中國首席經濟師的王慶，即將過檔中金公司，不過讀者唔好誤會，佢並唔係要搶中金現任首席經濟學家彭文生嘅飯碗，而是加盟該行嘅投資銀行部門，由研究工作改做大「刁」。

《華爾街日報》昨日曾就此事向王慶查詢，當事人拒絕對消息作出回應。不過據小琴從消息人士處了解，王慶下月起即會到中金履新，從事的工作亦與傳聞大致相符，換言之日後佢將由經濟學家轉型為投資銀行家，日後小琴見到佢，想必傾偈的話題亦不得不由宏觀經濟改為併購及上市。

擁有美國馬利蘭大學經濟學博士學位嘅王慶，曾經喺國際貨幣基金組織（IMF）工作6年幾，此後又轉職美銀及大摩兩家美資金融機構。不過佢之前從事嘅工作全部係宏觀經濟研究，唔知今次轉工，是否因為對住經濟數據太耐，需要尋找新嘅挑戰？

哈繼銘龔方雄轉型先例

巧合嘅係，中金前任首席經濟學家哈繼銘，去年亦轉投另一美資大行高盛的投行部門，先於王慶一步轉型。此前由經濟師轉做投行嘅，仲有摩通嘅龔方雄，同高盛的胡祖六。