比亞迪難得有好消息

【明報專訊】比亞迪股份（1211）傳來好消息。小琴聽聞，新加坡最大的陸路運輸服務商之一SMRT看中其電動車的潛能，已與其簽署諒解備忘錄，計劃組建合資公司共同開發並銷售電動車。

S-MRT，照字面解，就是新加坡地鐵，其實呢間公司不單經營地鐵，仲經營巴士、的士同多條輕軌線路。新加坡一向重視環保，SMRT就在最近一份公告中稱，要在日常運營中認真研究對空氣、水和能源的管理，為進一步提高空氣質量，正嘗試將電動車引入公共汽車和的士系統。

伙星洲SMRT辦合資公司

國泰君安分析員陳歡瑜就覺得，這個消息對公司好正面。雖然星洲市場唔大，但至少比起比亞迪一直想進軍嘅美國市場易打得多，又可起到帶頭作用。不過，由雙方傾好、落訂單以至付運需要幾耐全屬未知之數，又唔知使唔使經新加坡政府批准，比亞迪電動車一日未量產，一日都發揮唔到規模效應，簡單嚟講係賣一架蝕一架，所以消息對股價刺激都有限。

短期未必可刺激股價

不過，比亞迪的總部深圳舊年就已經同比亞迪買咗40輛e6電動車做的士，呢種的士同港深街頭常見的 「小紅」有所不同，乃紅白相間，車頭寫住大字「零排放」，車身就寫「E-taxi」。小琴每次落深圳，都好期望可以一試這款電動Taxi，但至今尚未如願，亦未聽講深圳政府有計劃要繼續採購。始終，電動車取代燃氣車是一項大工程，供電站的配套就已經不易，不知道今次SMRT是好有誠意要改善環境，抑或係學深圳做點面子工程呢？咁，就不得而知。

報料電郵﹕piano@mingpao.com