民豐小股東 怨食物唔好味

【明報專訊】一度因為收購本地老牌銀行創興銀行（1111）母公司23.43%成為城中熱話嘅民豐（0279），熱潮可謂來得快時去得亦快，噚日股東會就冇咁多傳媒去到採訪。至於一班小股東亦都有怨言，不過就唔係怨公司發展或者決策唔好，而係話餐廳啲食物唔好味囉。

話說民豐噚日9點喺寫字樓入面嘅餐廳開股東會，投票將廖氏集團23.43%權益賣返畀廖烈文夫婦。雖然唔入得餐廳裏面，小琴噚日都特登走去捧場，結果見證住公司9點開會，九點零五分已經拍手完場，事後民豐公告亦都話有超過九成現場股東投票通過，過程簡直快過打風。

通過廖氏集團23%權益 賣畀廖烈文夫婦

個會咁快完結，小琴心諗小股東應該都對公司冇乜意見啦，點知有幾個股東離開嗰陣就面露不悅，原來係唔滿意股東會上面嘅食物，有股東仲話「咁樣點食得㗎」，狀甚激動。計小琴話，股東會係表達意見嘅場合，嘢食好唔好食都仲係其次，係咪？

報料電郵﹕[email protected]