雨潤主席1.5億增持股份

【明報專訊】歷盡滄桑嘅雨潤食品（1068），繼星期一發盈喜「冲喜」股價外，噚日輪到主席祝義材出手，真金白銀喺個「孖屐」度掃入700萬股雨潤，公司公告冇披露主席咩價位掃貨，以雨潤收市價21.65蚊計，主席大拿拿攞咗成1.5億銀出嚟，反映祝義材好有決心話畀大家知，雨潤完全冇問題。

撐唔住股價 收市跌3%

不過祝義材大手掃入億五元貨，佔咗噚日成交兩成，都未能撐住雨潤個股價，收市仍然要跌3個巴仙。經過今次增持之後，祝主席個人持股量已升到去25.76%。大股東增持公司股份，一般都可以令市場回復信心兼刺激到股價，不過小琴有芬佬朋友就話，祝主席增持事先張揚不特止，仲要多次「回帶」，令到個增持功效可能會大打折扣喎。

原來美林噚日有個corporate day（投行畀公司同基金經理會面交流嘅活動），祝義材都有現身，仲講到明話會增持公司股份。不過芬佬朋友話，其實同一番話，喺雨潤「出事」當日──即市傳渾水研究會出份關於雨潤嘅報告，令到雨潤股價插水，嗰晚嘅電話會議上已經聽過，祝義材噚日又再回帶，至收市後公司發通告，證實主席終於增持股份，但個市場可能都消化晒呢個預期，仲郁唔郁到個股價，真係要今日開市後先知啦。