郭老太密密增持新地

【明報專訊】增持再增持，新地（0016）郭氏家族噚日再次出手用咗5840萬元買入公司50萬股份。由上月29日開始，郭氏家族已經先後6度增持，惹來市場傳聞新地家族會唔會係再起爭拗，所以先會頻頻出手穩住公司控制權。不過，有資深業內人士相信，純粹係郭老太覺得新地現價好抵啫！

業界分析：折讓大 家抵買

小琴見到新地連日6度增持，立即四圍八吓係咪家族股權再有爭拗。據資深的業內人士向小琴分析，新地大股東郭家持續地大手從市場買入新地，應與公司的控制權無關，因為郭老太及其兩兒子所持有的新地股份多逾四成，控制權絕對穩陣，近期連番買入的最大誘因，應是因為新地的股價跟每股資產值出現了很大的折讓，而且相信樓價很難大幅回落，因此覺得很值得投資。

計番條數，郭氏家族自從上月29日以來，已經6度增持新地股份，共買入500萬股，耗資近5.8億元，令郭老太嘅持股上升到42.29%。至於已經「分家」嘅前主席、大哥郭炳湘，就冇跟隨入貨喇。

話時話，舊年領大市升嘅本地地產股，表現已經大不如前。有唔少朋友私底下都同小琴講舊年見樓價係咁升，諗住買地產股抗通脹，點知通脹未抗、樓價未跌，股價已先縮了水，早知留番今日買iBond好過喇。不過，前陣子長實（0001）主席李嘉誠與恒地（0012）主席四叔李兆基，都連番增持旗下嘅地產旗艦，係唔係時候跟住出手呢？小琴就唔識答喇，留意住本報嘅投資版喇。

報料電郵﹕[email protected]