新聞類別
財經
詳情#
【明報專訊】陳豪鬥Rubberband，你會撐邊一邊？講緊嘅係電盈（0008）同和電香港（0215）嘅家居固網寬頻代言人，和電香港旗下3香港為咗打響家居固網嘅品牌，專程請Rubberband擔任代言人。和電香港固網消費市場主管何偉榮仲話，相信和記畀到大家嘅優惠絕對多得過陳豪。
電盈近排搵咗無綫小生陳豪做代言人，陳豪形象入屋，連小股東都喺股東會上讚「筍盤」。對手來勢洶洶，和記都不甘示弱，搵埋Rubberband 呢隊樂隊一齊宣傳，又唱又跳，廣告噚晚已經出街。
使8位數字 搞宣傳活動
何偉榮噚日講，3香港唔會剩係畀優惠公屋住戶，絕對係一視同仁，擺到明寸電盈近排針對公屋同居屋住戶推出嘅寬頻優惠。流動電訊營運總裁龍佩英亦承認，今次嘅優惠同先前差不多，無話特別要打減價戰，但宣傳活動一共會使成8位數字，即係成千萬元，希望令家居寬頻呢個品牌多人認識，生意可以倍增咁話。
電訊商嘅固網寬頻都大打宣傳戰，身為客戶嘅我哋就當然最關心電訊商仲有無減價空間先。龍佩英話，價格要由市場來定，無講明未來仲會唔會減價吸客。唔知到有「殺價天王」嘅香港寬頻，會唔會再殺出來，殺各方一個措手不及呢？
報料電郵﹕[email protected]
回應 (0)
