任達華胞兄棄警從商

【明報專訊】點樣可以做到退而不休，影星任達華哥哥任達榮就係一個好例子，舊年才退任警務處副處長嘅佢即將從商。恒和珠寶集團（0513）噚日宣布，已委任了任達榮為總經理，專門負責發展礦業，實行由警界轉戰商界。

恒和主席陳聖澤喺公告入面，大讚任達榮擁有豐富嘅公共行政經驗並具卓越嘅領導才能，熱烈歡迎任達榮咁話。而任達榮即將負責嘅業務，就會係恒和近年積極收購嘅金礦及礦石業，所以任達榮呢次真係擔正大旗。睇番紀錄，陳聖澤同任達榮都分別獲得過特區政府頒發嘅紫荊勳章，兩位可能因而相識，造就任Sir轉戰商場。

任達華演PTU嘅形象當然深入民心，至於大哥任Sir嘅「差齡」確實亦相當厲害。任達榮係1972加入皇家香港警察隊，分別擔任過三合會調查科主管同埋PTU校長，2001年接任警務處副處長，去年3月開始退休，當時接任佢做副處長嘅正是現時警務處處長曾偉雄。

恒和主席同曾獲紫荊勳章

過去前警官入商場，最為人認識嘅可能就係富利堡行政總裁黃毅力，棄警從商嘅佢不但創立自己嘅汽車代理生意，更加出書同大家分享心得。好似任達榮咁高職位的警官從商，小琴記得仲有「前一哥」曾蔭培。曾蔭培喺2003年退休之後，2004年就任職新創建（0659）執行董事，近年每次都親自出席新創建嘅業績會，唔知第時小琴有無機會親睹任達榮出嚟主持恒和業績會呢？

報料電郵﹕[email protected]