新聞類別
財經
詳情#
【明報專訊】現代美容（0919）經歷風風雨雨，人事變動，最終都係要創辦人曾裕出山，業績先漸見佳境。小琴噚日留意到現代美容2011年度嘅年報入面，有關於董事酬金嘅一欄，就見到曾裕嘅人工比起佢之前擔任主席嘅時候，差唔多少咗一半，唔知係咪因為業績最近一年先好番啲，所以人工都畀少啲呢。
年報上顯示，曾裕去年4月再任主席後，截至今年3月底止嘅年薪係518萬元，由於舊年佢「退居幕後」，由老公李守義擔任主席，所以舊年曾裕係無人工嘅。不過，相比起2008年度，以及2009年度，曾裕嘅人工都係過千萬元，相比之下，真係少咗好多。
出山一年 公司即發盈喜
由於老婆重新出山，所以老公李守義同仔仔鄺旨呈舊年9月都雙雙辭去執行董事一職，所以人工分別只有685萬元及443萬元。
現代美容2006年上市以來，大部分消息都唔多理想，曾裕2008年因健康問題請辭、由丈夫李守義頂上。集團2009年換核數師，兼換埋3個獨立非執行董事。集團喺2009年、2010年嘅業績都要發盈警。不過，「美容女王」曾裕去年4月一出山，公司今年5月就即刻發盈喜，睇嚟現代美容真係要曾裕睇住至得。
報料電郵﹕[email protected]
回應 (0)
