港源委兩新執董 救形象

【明報專訊】香港資源（2882）近排「當黑」，兩位執董黃英豪博士同「四叔親家」徐傳順早排齊齊被廉署邀請協助調查，雖然公司多番說明同公司無關，但到今時今日都仲係復唔到牌。香港資源噚日公布委任咗兩個新執董，分別係董事學會會員嘅林國興同資深會計師黃詠恩，似乎想再搞好啲個公司管治形象，博復牌咁喎。

香港資源上個嚟拜就出咗個公告，表明黃博士同徐生畀老廉邀請協助調查，係因為當年收購海域嘅事件，同公司現時嘅業務無關，黃博士上個星期亦都話公司答緊聯交所問題，爭取盡快復牌，但始終無乜聲氣。咁啱小琴噚日見到香港資源就突然出咗個通告，委任多兩個執董，其中林國興除咗係董事學會會員，仲係金至尊（0870）副總裁、香港特區太平紳士，黃詠恩就係澳洲會計師公會資深會員，核數方面好有經驗咁話。

香港資源就無解釋點解突然委任兩個執董，不過小琴就覺得，近排市場對各種消息咁敏感，兩名新執董監管方面經驗又唔錯，至少可以加強下公司管治形象，話唔定對復牌仲有幫助添！