彤叔變身英公屋包租公

【明報專訊】我戇居居諗緊香港樓市會點時候，無寶不落「鯊膽大亨」彤叔（鄭裕彤），已經一個轉身做英國包租公，仲係公屋大王。彤叔不嬲都醉心英國豪宅，今次帶頭拍住愛將李湘（Sammy Lee），連埋一名叫做Peter Fung、疑似前排故宮被偷寶貝金融家馮耀輝男子，用3000萬英鎊，差唔多3.8億港元，買一間專營英國公屋公司六成股權，做起越洋包租公。
彤叔睇中Pinnacle Regeneration Group係英國唯一兩間可以供應公屋（Council House）商業公司之一，擁有2萬多個公屋單位，為另外4萬個提供管理服務。英國政府近年缺水又缺屋，一路都掛住將公屋私有化，舊年更加取消租戶終身制，令到英國公屋「富戶」冇得一世租平屋，鬧得怨聲載道。
英政府莫財 公屋私有化
小琴睇番英國租屋價錢，雖然已做足晒心理準備，都不免被嚇親。西敏寺（Westminster）即係倫敦市中心一間四人房公屋，租一星期只需140英鎊，相當於月租7000蚊港紙，平過香港好多好多；但如果去私人市場租同樣一間屋就要1600英鎊一星期，一時就多10倍。唔怪得排緊隊入公屋家庭就有180萬個，同香港都幾似。面對咁大需求，仲有5%穩定收益，彤叔咁精靈又點會放過喎！
最後小琴都要八卦下呢個李湘，佢係負責彤叔海外投資馬仔，代表作係早排買入倫敦萬豪酒店，以14億身家上榜《星期日泰晤士報》英國一千大富豪，排第554。小琴用email試圖向馮耀輝查詢個Peter Fung係咪佢，但至截稿之前都未獲回覆。