大摩疑似奏錯「摩笛」

【明報專訊】香江魚缸呢兩日有番啲生氣，不過啲評級機構同投資銀行呢排就唔知係咪風水原因定其他問題，頻頻出錯。穆迪上個禮拜份紅旗報告畀啲公司群起攻之，話報告資料唔準確，噚日就輪到大摩疑似奏錯「摩笛」，一個鐘頭內出咗5份報告，一時話睇恒生（0011）未來15日有七至八成機會股價跑輸同業，一時又話會跑贏大市，一時仲話要終止策略建議，即係收番份報告添！

一個鐘5份恒生報告 又輸又贏

做得大摩嘅客戶非富則貴，如果喺一個鐘內收到咁「豐富」嘅資訊，小琴真係戥啲大客頭暈。摩根士丹利發言人就話，今次純粹係公司發出投資報告嘅系統出現問題，強調並非相關嘅分析員改變觀點喎。發言人又指出，分析員對於恒生嘅睇法以最後一份報告為準，即係預期恒生股價，喺未來15日有七至八成機會跑輸大市。至於大摩有冇向客戶澄清，邊份報告先為之有效，靚女發言人就話無可奉告嘞！

另一間美資大行高盛今個月初先擺烏龍，將興達國際（1899）放入確信買入名單，之後又話計錯數將人哋掹番出嚟，搞到間公司股價無端插水。睇返噚日恒生個股價，經過大摩喺中午12點幾至1點幾5度唱好又唱淡之後，全日低位就喺1點半出現，收市就跌少少，逆市跌0.4個巴仙。