奕達盈警 歸咎大運會

【明報專訊】深圳主辦嘅世界大學生運動會（大運會）下個月舉行，當地政府用咗兩年時間去整頓市容，但估唔到政府搞運動會，都會令到上市公司錄得虧損。前日專門從事印刷線路板加工嘅奕達國際（2662）就發盈警，話因為大運會搞到停電停產，預計今年收入下跌。

指停電停產 影響收入

如果小琴冇記錯，深圳政府有講過大運會期間，建築項目會被叫停，污染企業限產停產，主場地附近嘅工廠亦可能要停工，避免用電負荷，但係奕達位於深圳嘅廠房響寶安區，大運會場地卻響龍崗區，一個東一個西，咁都影響到佢哋生產？

奕達果邊昨日就同小琴解釋，佢哋響4月份收到政府通知，話因為要舉行大運會，所以需要更換喺深圳寶安機場附近嘅地下電纜改善供電情况，其間每星期停電兩日左右。因此，停電影響到公司生產量減少。

不過，奕達方面話大運會臨近，更新工程已經完成七七八八，所以停電日數已減少，佢哋仲話，長遠嚟講，更換電纜對提升嗰區嘅供電能力有好處，都係好事，但因為停電始終係令到公司收入減少嘅其中一個原因，所以按規矩都要寫入通告度。