黃光裕遭民事索償 隨時賠成億

【明報專訊】國美電器（0493）創辦人黃光裕（圖）雖身陷囹圄，但有關佢嘅新聞就日日新鮮，早前先有消息指佢正在競投一艘退役航空母艦，資金好似唔成問題咁，不過噚日內地媒體就報道，黃光裕內幕交易民事賠償案將於9月正式開審，隨時要面對億元嘅賠償金額。

黃光裕內幕交易案喺舊年5月定罪，之後佢嘅上訴喺8月二審嘅時候維持原判，然後就有投資者入禀法院遞交訴狀，要求法院判決黃光裕、杜鵑等內幕交易責任人賠償自己嘅損失。據內地媒體報道，單案喺9月開審時，黃光裕老婆杜鵑好有機會被傳召出庭，屆時久未露面嘅杜鵑，應該都會受到唔少傳媒追訪。

有分析就話，黃光裕被起訴嘅民事賠償案一旦正式開庭，黃光裕就可能要面臨衆多投資者提出嘅民事賠償訴訟，賠償金額有可能會高達幾億元，所以身在獄中嘅黃光裕，睇嚟都有排煩啦。

轟動一時嘅黃光裕內幕交易案喺上年5月判決，黃光裕最後罪名成立，判處期徒刑14年加罰金6億元人民幣，沒收個人財產2億元人民幣。單案喺2009年被揭發，都擾攘咗成年，其間仲搞到國美股價一蹶不振添。黃光裕內幕交易涉及嘅內地上市嘅北京中關村。