有人200億撐新世界供股

【明報專訊】新股年尾翻生，大型新股排隊抽水，但係市場反應好一般，郁啲超購十幾廿倍嘅情况不復見，好似電盈（0008）分拆出嚟隻香港電訊信託（6823），公開認購反應慘淡。能夠喺呢個淡市中令投資者乖乖掏腰包，仲要搶住要貨，嗰啲就為之高手啦。小琴講緊邊個？咪就係呢期最紅、全城富豪力撐嘅彤叔鄭裕彤囉。

彤叔認真老而彌堅，呢邊廂搞緊隻親生仔周大福珠寶（1929）上市，那邊廂新世界發展（0017）同新世界中國（0917）大幅度供股，真係開行抽水機。新世界發展上個禮拜嘅股東會，大部分小股東對於新世界供股顯得好勞氣，喺會上係咁質詢彤叔、純官鄭家純等一眾管理層，搞到彤叔嗰日都唔係咁好面口。

不過，新世界公布嘅供股結果，原有的供股權已經有98.5％認購，計埋額外供股，就有成兩倍超購。有投資者仲申請額外供股超過40億股（小琴斷估大拿拿攞出成二百幾億，除咗彤叔本人都好難有第二個），喺咁嘅市况下有咁嘅成績，仲唔係高手？

非彤叔 恐怕難有他人

其實新世界個「威士」（供股權）早排喺市場買賣嗰陣都好搶手吓，皆因望落個價計埋供股價，同新世界正股折讓頗大；不過，有熟路嘅朋友提醒小琴，今次啲供股股份喺新世界除息日後先上板，扣返末期股息，其實冇乜肉食，即係話大折讓只係一個美麗嘅誤會。但正所謂講多無謂，行動最實際，觀乎今次嘅供股反應，睇嚟大家都覺得新世界5.68元抵供啦。

email:piano@mingpao.com