國開行香港開檔 彤叔企中間

【明報專訊】中環呢期「最紅」一定非彤叔鄭裕彤莫屬，周大福珠寶（1929）招股新聞日日霸住報紙當眼位，招牌紅噹噹嘅周大福又開到一街都係，估唔到連國家開發銀行喺香港開檔，都見到彤叔嘅身影！

內地啲大型國企早兩年成日話要「走出去」，意思係去海外做吓收購合併，或者開拓境外市場，打頭陣係幾隻大型油股，幾年以來成績不過不失，噚日輪到國開行同國開金融，嚟香港設立國開國際控股有限公司，話要以香港國際金融中心為起點，登陸全球資本市場喎。

呢啲大場面，當然有好多財金界巨子出席，除咗主人家國開行董事長陳元，國家領導人代表有政協全國委員會副主席董建華，香港官員就有財經事務及庫務局長陳家強、金管局總裁陳德霖，行政會議成員查史美倫。

不過，喺呢啲場合最重要啲大合照環節，企中間嘅統統都唔係以上人士，而係一身西裝襯波鞋打扮嘅彤叔，根據新聞稿話，國開國際同新世界集團、美國德太集團（TPG）同歐洲基金Permira等簽訂戰略合作協議，但點解彤叔獨領風騷企中間，就不得而知了，只能夠講一句「誰能代替彤叔地位」。