唐唐每件事3句要講完

【明報專訊】特首參選人唐英年噚日宣布政綱重點，邀請傳媒高層交流期間，被人問咗一條極難答嘅問題，就係點解唐唐坐低傾偈可以講得有紋有路，但每次公開場合答記者問題就口窒窒講錯嘢，畀人笑係豬、係無能，咁樣落去點算好？唐唐起初話條問題好難答，笑咗好耐，反問大家有乜高見喎。


唐唐話，佢有一個好嘅競選團隊，呢個問題，團隊仲緊張過佢，但最終把口喺佢度，靠佢自己講，在座嘅朋友識佢咁多年，好快知道佢想講乜，但前線記者未必知，而且一般答問時間好短，唐唐話自己喺政府工作耐咗，習慣諗嘢係好有系統嘅，要較長時間至講得完，但競選團隊就要求他出嚟講嘢，每件事都要三句就講完，呢樣嘢真係好難，所以有時就詞不達意囉。


習慣咗講嘢「有系統」

除咗公開發言嘅問題，有人繼續問佢到底有冇私生子，話唔想將來佢嘅人事任命畀公眾猜度有否血緣瓜葛咁話，唐唐話已經澄清咗感情缺失唔關公職人員事，純粹係私人嘢，所以冇嘢再補充。