大班唔認教唆壹仔造假

【明報專訊】《蘋果日報》總編輯張劍虹噚日喺《爽報》專欄大談往事，提醒傳媒不能造假。話說當年佢仲幫緊《壹週刊》做嘢，採訪鄭經翰被人打一事，由於距離事發時已有幾日，所以大班面上嘅傷痕淺色咗，故仔出街前，佢哋將大班面上嘅瘀痕「加色」，最後被踢爆，搞到老闆肥佬黎要道歉。佢喺專欄就話，原來當年係大班叫佢將瘀痕加深啲色。


張劍虹話，由於訪問當日已經距離事發有幾日，所以傷痕唔深色，當時大班同佢講﹕「加深啲咪得囉。」於是張劍虹真係叫人用電腦加深顏色，報道出街後，反被大班掉轉頭踢爆《壹》造假。呢件瘀事，張劍虹話不時講出嚟，就係要警惕自己。


Emily噚日打畀大班問個究竟，大班當然否認有叫人做假，亦唔明對方點解舊事重提。大班仲反問，點解張劍虹當年唔講，若果當年講咗，咪唔駛肥佬黎道歉囉。