廉政短片賽巴國首奪獎

【明報專訊】廉政公署嘅「國際廉政宣傳短片比賽」噚日揭盅，金、銀、銅獎分別係新加坡、克羅地亞同印尼代表奪得。奪得優異獎嘅巴布亞新畿內亞代表對Emily講，參賽短片係佢哋嘅處女作，只係用咗7日就完成。


呢部巴國短片長1分鐘，講貪污蠶食人民各方面嘅生活，例如影響基建，令小朋友冇食水，但詳情Emily就唔講太多，稍後ICAC會將部分得獎作品放上網，到時大家可以慢慢欣賞。 負責反貪嘅巴國申訴專員Chronox Manek話，佢哋國家有863種語言，而且文盲比率高，所以短片以影像行先，要簡單啲！


同樣以影像行先嘅仲有內地代表，佢哋今次有一條動畫片同默片得獎，最高人民檢察院職務犯罪預防廳廳長宋寒松話，因為影像直接，就算係喺火車站呢啲人多嘅地方播都唔怕嘈。至於奪得金獎嘅新加坡代表就話，佢哋作品係由真實個案改編，Emily睇完都覺得好有電影感。印尼嘅代表就話畀大家知，原來印尼都有豆腐渣工程，好多學校起咗一年就倒塌，因為官員將建築費中飽私囊。打擊貪污真係全世界政府嘅責任！