德金負面消息下 連炒兩日

【明報專訊】過去兩日大市畀歐美股市拖累，唔知係咪部分資金嚴重缺乏方向，而轉炒停牌近兩個月至本周三先至復牌嘅德金資源（1163），令佢周四及周五分別勁升30.7%及14.8%，成為逆市奇葩。更奇嘅就係佢旗下兩間附屬公司嘅資產畀內地法院執行查封令，負面因素當前竟然照樣被連炒兩日，真係凡事皆有可能。


其實早喺德金10月12日停牌前數個交易日，佢嘅股價亦曾經出現異動，大升約三成。及至本周二，佢哋喺復牌公告入面透露，其持股75%嘅清大德氏被河北省承德市中級人民法院執行查封令，凍結附屬嘅隆鑫礦業80%及龍德礦業93.75%股權，及各自之採礦許可證，以待一項合約訴訟結果。


雖然德金強調，除非佢哋合約訴訟中被判敗訴，否則查封令目前對其日常業務並無影響，不過，德金喺周三復牌當日，仍然急瀉23%至0.062元。而其後兩日德金被炒起，股價突破20天線，噚日收報0.093元，成交金額1953萬元。