忘不了你的嶽曲

【明報專訊】一如以往，一年一度嘅《歡樂滿東華》前晚亦播足成晚，Emily睇咗一粒鐘已經有啲「吽吽哣哣」，但當食物及衛生局長周一嶽變身Alan Tam、高唱《忘不了你》時，Emily同屋企人即刻起哄。想知點解？大家上網回味吓就知喇，網民睇完佢半走音又甩拍子，就話笑到反肚兼無力，仲話要力推呢首「『嶽』曲」，要推到阿周局長做12月之星喎。


周一嶽向來鍾意表演唱歌，前晚仲有東華三院黃笏南中學管弦樂團伴奏，周局長好陶醉，不時唱到合埋眼，事後佢話自己第一次出咁大嘅場面，陶醉得嚟都好緊張。


周一嶽東華獻唱 技驚網民

網民睇見佢咁落力，尤其是最後一句「我忘不……呀……了你」，就喺高登回敬佢﹕「只要我一息尚存，我忘不了你~~你~~~！」有人仲話似聽技安開演唱會，但就讚啲學生好勁，坐喺後面可以無動於中。不過Emily諗，若周局長想再幫多啲東華，除咗獻唱，批錢畀百年老醫院廣華醫院重建咪仲直接。


曾浩輝柯景騰上身

除了周局長，唔少醫生都鍾意表演唱歌，好似衛生防護中心總監曾浩輝，上個禮拜五就喺衛生署個晚宴自彈自唱《那些年》，雖然都有少少甩拍子，但就贏得唔少記者掌聲同支持，最尾仲換埋皮褸、牛仔褲，拉個女記者，扮《那些年》男女主角放天燈，搞到全場氣氛高漲，大叫「encore」。曾醫生就梗係開心到不得了，仲自爆中途換衫好趕，幾乎趕唔切拉褲鏈。