選委參選人：廢票裁決標準不一

【明報專訊】選委會選舉結束，Emily聽到有啲選民呻投票好麻煩，事關一張選票要選十幾個名，仲要好似考試咁，要填黑晒候選人姓名旁邊嘅橢圓圈。選舉管理委員會主席馮驊事前講明唔可以畫記號或者變做剔號，但有參選人就同Emily講，選舉主任對呢類問題選票嘅裁決標準好唔一致。


所謂問題選票，即係張選票有啲唔正常嘅情况，例如多咗啲記號，或者填得唔正，選舉主任會以實物投影機向點票站嘅在場人士展示問題選票，然後裁決係廢票定係有效票。


用剔號放生 畫一畫裁無效

參選資訊科技界嘅方保僑話，佢有留意到選舉主任嘅裁決，發現一啲用剔號嘅票獲「放生」，獲裁定為有效票，反而一啲喺橢圓上面畫一畫嘅投票方法，就裁定為無效票，佢覺得奇怪，點解裁決標準咁唔一致。根據選舉指引，如果張問題選票會畀人識認到投票者身分，又或者係唔填滿個橢圓，都會計算做廢票。