張廿蚊嫌天水圍菜「貴」

【明報專訊】自由黨張宇人上年發表完「廿蚊論」後，即成為「惹火尤物」，今次佢喺選委會飲食界牽頭嘅「鑽石名單」大勝，亦難逃被狙擊嘅命運。話說噚日當張宇人同一眾「鑽石名單」嘅成員風騷地接受傳媒訪問時，社福界參選人、由幾名基層市民組成嘅「草根持份者」拎住幾棵菜心踩場，質問呢班選委「知唔知米價」！


新光集團常務董事總經理胡珠喺呢個時候，搶答話係6蚊一斤，但原來菜心喺天水圍要賣成12蚊一斤。草根持份者促請呢班飲食界選委，選出一個肯回購領匯同增加最低工資嘅特首。


基層問菜心價 胡珠答錯6蚊

不過，張宇人聽到就搖晒頭，話最低工資水平應該由市場決定。草根持份者將棵菜心送畀佢時，張宇人仲頭也不回咁話﹕「呢啲咁貴嘅菜心留番畀你哋自己食啦！」