大摩聖誕籌款 245萬創新高

【明報專訊】話咁快又年尾，聖誕節臨近，小琴朋友又多，每年呢個時候都收到唔少聖誕禮物籃。不過老老實實，今年要到12月中先開始收到禮物籃，而且禮物籃明顯「縮皮」，唔使問分析員朋友都分析到，市道唔好，大家睇出年更差，所以送禮都手緊咗。好彩市况不景都仲未影響到啲慈善活動，好似大摩一年一度嘅聖誕籌款，善款冇縮水之餘，仲創新高去到245萬元添！


九龍站獻唱 投入社區

大摩年年都會搵班同事喺商場獻唱兼籌款，佢哋今年就喺九龍站即佢哋office樓下個商場表演，摩根士丹利亞太區聯席首席執行官威廉思眾（Bill Strong）話，佢哋間行嘅核心行事宗旨係全心投入到社區活動喎！咁睇相佢哋成班同事確係表現好投入嘅。


威廉思眾又話，今次所得善款會捐畀3個機構，分別係兒童心臟基金會、智行基金會及香港基督教更新會，預期將有超過650名兒童同年輕人受惠。