摩通私銀 鬥食餃子做善事

【明報專訊】臨近聖誕節，唔少企業內部都有慶祝活動，亦有唔少慈善活動舉行，希望趁佳節幫到有需要嘅人嘛，好似摩根大通私人銀行，噚日就搞咗個別開生面嘅同事吃餃子慈善籌款比賽，為愛心聖誕大行動（Operation Santa Claus）籌款。


呢個比賽由摩通私人銀行嘅同事分組參加，男同事就4人一組，女同事就8人一組，喺8分鐘內鬥食得多餃子，而佢哋每食一隻餃子，摩通私人銀行就會贊助佢哋，用嚟支持愛心聖誕大行動。


大家估吓今次呢個比賽係男同事定女同事勝出呢？答覆竟然係女同事贏咗，8個女仔嘅一組喺8分鐘之內，食咗81隻餃子勝出，即係平均每人食咗10隻餃子，都幾犀利㗎，雖然女仔十個有九個貪靚怕肥，但為咗慈善都肯放膽食，小琴都好佩服佢哋。