新華保險送禮 錯漏百出

【明報專訊】噚日係兩大新股新華保險（1336）同周大福珠寶（1929）掛牌的日子，港交所觀景台朝早相當熱鬧。但小琴噚日採訪上市儀式，唔單止恍似乘坐時光機咁返到一個月前，仲見證港交所「瘦身」為「證券交易所」，你話幾過癮！


當然呢個係講笑，小琴想講嘅其實係新華保險噚日送畀港交所嘅紀念品標籤，唔知點解竟然擺烏龍，將上市日期寫為2011年11月，而唔係12月喎。非但如此，標籤上連港交所嘅全名都有誤，由「香港交易所」（包括聯合交易所、期貨交易所和中央結算），變為「香港證券交易所」，無啦啦剝奪咗港交所嘅期貨和結算嘅功能。


得意嘅係，噚日無論係公司方面或者係佢嘅公關公司都無人發現，公司照頒呢件紀念品，而港交所又照收。保險公司向來需要精打細算，連呢類細節都出錯，新華保險以後真係要多多留意啦。