周大福上市 李嘉誠到賀？

【明報專訊】「彤叔」鄭裕彤嘅企業旗艦周大福（1929），雖然喺市况唔係好理想嘅情况下，但最終都成功上市，噚日喺上市儀式上，彤叔同埋「純官」鄭家純，仲有第三代接班人鄭志剛、鄭志恒都有出席，但最令人驚奇嘅係，李嘉誠都有出席周大福上市儀式。


吓？誠哥都出席周大福上市儀式咁畀面，有冇搞錯先？哦，原來真係搞錯咗，事關喺港交所新設嘅上市敲鑼環節，純官走去敲鑼嘅時候，司儀竟然好大聲咁叫咗佢做李嘉誠博士，令到在場賓架同嘉賓們都呆一呆，小琴亦要load一load，諗下究竟周大福入面有冇一個叫「李嘉誠」嘅管理層呢。雖然純官同誠哥都一樣有博士銜頭，但無論樣貌背景年齡都好唔同啫，司儀咁都搞得錯，認真抵打。


純官敲鑼 司儀叫錯做誠哥

講開又講，近排唔少公司上市，都興送啲blink blink紀念品畀港交所，噚日周大福就送咗鎮店之實，啱啱喺上年年頭以天價投得嘅507卡南非鑽胚「庫里南遺產」，同埋已經切割好嘅24粒鑽石畀港交所，最大個粒鑽石有成100卡㗎，不過當然全部都係仿製品啦，上市儀式咁多人，唔通隨便拎啲真鑽石出來咩。


呢批「庫里南遺產」鑽石家族，最大嗰粒據知價值2億元，而其餘23粒較細嘅鑽石，價值都過千萬，全部鑽石嘅相都印咗喺招股書上面，稱得上係周大福嘅生招牌。


email:piano@mingpao.com