澳門銀娛3D影院開幕

【明報專訊】股民今年炒股輸多贏少，無他，大多數股份都係跌完又跌、低處未算低，唯一令人振奮嘅非濠賭股莫屬，濠賭股中又以銀河娛樂（0027）係大贏家，佢路氹個新場澳門銀河未開之前，「孖屐」抱懷疑態度，結果年中開幕後贏口碑、贏市佔率，再帶埋個股價坐火箭，一手炮製呢個項目嘅Francis呂耀東可謂飲得杯落。佢哋噚日就食住個勢，跟手開埋酒店入面個3D影院。


Francis話，個戲院連埋成個東翼廣場耗資6億銀，除咗可以搞首影，仲可以搞吓新年倒數、大型比賽等活動，而呢個全澳門首個3D影院，首映嘅就係徐克執導、李連杰主演嘅《龍門飛甲》。


睇完預告片嘅Francis就笑笑話，5年前叫佢搞3D影院，佢未必有信心，但自從《阿凡達》後，3D電影技術進步神速，兼且真係吸引到觀眾入場，先令佢下定決心喺澳門銀河搞返間戲院，希望可以令到非博彩業務收入繼續穩步上揚。聽講間戲院未開幕已經賣咗2000張飛，個頭威相當唔錯喎。