彤叔6.6億增持新創建

【明報專訊】呢排股市樓市都冇厘神氣，股民玩唔掂正股走去玩窩輪牛熊證，而啲大孖沙就密密增持公司股份，好似誠哥李嘉誠差唔多日日吸納長實（0001），四叔李兆基都間唔中增持恒地（0012），連啱啱將隻周大福珠寶（1929）拎嚟上市嘅彤叔鄭裕彤都出手，當然唔係買番周大福珠寶啲股份啦，彤叔自己可唔可以成功賣咁啲舊股都仲要睇個股價生唔生性，彤叔今次增持嘅係新創建（0659）。


其實大孖沙買番自己公司股一啲都唔出奇，佢哋對公司前景有信心，咪真金白銀攞錢出嚟買股。不過今次吸引到小琴視線，係因為彤叔係喺場外增持，而且金額唔細，用成6億6銀買入6427萬股，每股平均價10.347元。


另外，自從Cheng Yu Tung Family （Holdings II） Limited（鄭裕彤家族控股II）喺周大福嘅招股書曝光後，呢個二號家族基金繼續同一號家族基金Cheng Yu Tung Family （Holdings） Limited共同進退，喺新創建最新持股量同樣係64.31%。