許家印搭上彤叔靠鋤弟

【明報專訊】被內地傳媒譽為「最帥房地產老總」嘅恒大地產（3333）主席許家印，一直都係鎂光燈焦點，許總想低調都低調唔嚟。可能因為咁樣，許總索性畀內地名記者、《南都周刊》北京採訪中心副總監張守剛跟佢兩年，探討一下恒大同許總自己嘅成長之路，寫成《恒大傳奇──解密中國首富許家印》。


講真，大陸啲地產大佬有鋪出自傳癮，小琴一般都唔係太有耐性睇呢啲書。不過，小琴噚日揭咗呢本書幾頁就發現許總嘅「情史」，不得不同大家分享。


新世界發展（0017）主席鄭裕彤08年幫過許總渡過難關，好多人都知，但兩人當初點結緣呢？根據本書講，許總賣樓一定會搵明星撐場，又特別鍾意搵英皇旗下藝人，結果許總認識咗英皇大股東楊受成。而喺楊受成幫忙下，許總就識到「大恩人」彤叔嘞。


楊受成做媒人 玩牌玩出真情

本書又話，許總08年喺香港「撲水」期間，差唔多個個禮拜都要去彤叔屋企同佢鋤大弟，又要同彤叔大仔鄭家純鬥地主，有時一玩就玩通宵，就係咁，許總同彤叔結下情誼。而當恒大08年3月上市觸礁後，彤叔就抬咗億五銀美金入股恒大，到09年底恒大再次上市，彤叔再做埋恒大基礎投資者，認真有情有義。


計小琴話，彤叔喺恒大水緊時出手相助，固然好幫得手，但楊受成呢位媒人功勞都好大，唔知恒大會唔會再用多啲英皇旗下藝人做宣傳嚟報恩呢？

email:piano@mingpao.com