新世界旅遊指南

【明報專訊】今時今日香港地已經成為內地遊客嘅旅遊天堂，幾乎每一日都喺香港可以見到內地旅客迫爆尖沙嘴、銅鑼灣嘅景象，新世界（0017）最近就出咗本小冊子，向一班自由行旅客介紹點樣遊覽香港。點知小琴一睇裏面內容，八成都係講緊新世界嘅樓盤同商場，底頁仲送埋周大福（1929）、會展同K11嘅購物coupon，清一色係彤叔生意。


翻開新世界出版嘅《香港旅遊及投資指南》，主要分成地標建築、文化訪尋、風光漫步、衣、食、住同行7個欄目，介紹香港嘅唔同特色，好似地標建築有會展、名鑄，文化訪尋有春暉8號同車公廟站住宅項目，風光漫步有柯士甸站同落禾沙住宅項目，衣有Sogo、K11同愉景新城，食有君悅扒房Grand Hyatt Steakhouse，住有君悅同尖沙嘴凱悅，行就有新巴同新渡輪…咪住！咁咪即係全部都係幫襯彤叔！

小琴睇完本小冊子，初頭就覺得好Hard Sell，後尾就覺得都合情合理，無他嘅，香港各行各業大部分都有四大富豪腳印，咁出得本小冊子，就梗係要Sell吓自己㗎啦，唔通免費幫超人、四叔、同新地兄弟賣廣告咩！