女人街洗脫老翻場惡名

【明報專訊】俗稱「女人街」嘅旺角通菜街，終於洗脫「冒牌市場」臭名。今年3月，榮登美國貿易代表署（USTR）「冒牌市場」榜單嘅女人街，兩日前獲得平反。美國人就話，香港海關力掃假貨係今次除名嘅主要原因，咁樣睇來海關今次真係抵讚啦。


話時話，香港人不嬲都知「女人街」賣緊啲乜嘢貨色，但佢作為「冒牌市場」正式登陸國際，都凈係今年嘅事。「女人街」畀USTR點名全世界「名聞遐邇」嘅冒牌貨黑點，係直接令到香港「購物天堂」美名蒙上污點。


百度同時洗去污名

不過唔到一年，USTR就公布最新檢討結果，為「女人街」洗脫惡名，還返香港正貨之都嘅清譽，同時獲番清白身嘅仲有內地搜索引擎一哥百度。其實，大家唔好睇小今次除名，因為除咗「女人街」之外，其他入圍「冒牌市場」嘅全部都係來自內地、印度、墨西哥呢啲發展中經濟體。香港作為唯一嘅發達地區派員駐紮其中，唔單自降身分，都會影響國際品牌嚟港開舖上市嘅信心。