滬環保「經濟墓」 僅售880蚊

【明報專訊】噚日小琴聽朋友講，上海浦東機場附近多咗個「公益性生態公墓」，以880蚊人仔嘅超低價向市民「公開發售」。仲講到極之環保同符合生態環境。


話「生態」真系冇假。首先就所有墓地都凈系一個iPad咁大，節約土地資源。更加得意嘅係，逝者啲骨灰會裝喺落葬一個月就會溶解嘅可降解骨灰盒入面，不單止完全回歸自然，仲可以實現土地重複利用，造福後世，真可謂功德圓滿。


上海土地資源寶貴，本身一個墓穴啲價錢都吓吓過萬，殯葬協會就話今次啲環保墓價位仲低過成本。協會仲話，希望「十二五」期間市民選擇生態葬嘅比例由目前19%升至28%。不過小琴就有小小顧慮，如果真係墓地都重複利用，資源共享，咁清明掃墓咪會有幾批人喺同一塊地上面打交？好啦好啦，聖誕前夕，小琴都係唔講笑，正正經經祝大家都平平安安，Merry Christmas啦！