高盛撐HKT 出手又出口

【明報專訊】電盈（0008）分拆隻香港電訊信託（6823）掛咗牌1個月有多，股價仲係原地踏步，之但係上個月港股靜到無倫，相對嚟講香港電訊信託表現都唔算失禮。不過，小琴想講，可能係生意淡薄，啲投行「售後服務」愈來愈好，有份保薦香港電訊信託上市嘅高盛，除咗喺穩定價格期間真金白銀買貨之餘，噚日又出報告唱好香港電訊信託，實行手口並用力撐HKT！


升評級「買入」 上月出十幾億維穩

高盛首予香港電訊信託「買入」評級，仲同時納入埋「確信買入」名單，皆因佢致力推動光纖同埋以寬頻作為推廣目標，有助維持80%固網EBITDA佔有率喎，12個月目標價5.95元，較現價有成30%上升空間。


其實高盛上個月已經用咗十幾億銀，喺市場上掃咗超過3億個合訂單位，幫手「穩定」價格，結果香港電訊信託個價的確好穩定，成個月都係喺4.5元至4.58元上落。不過，即使「金人」（即Goldman，高盛也）「手口並用」，香港電訊信託噚日都要逆市跌少少。