美掛牌中國民企 收檔多過入場

【明報專訊】2011年中國民企風暴席捲美國市場，曾經風靡一時嘅中國概念股淪為垃圾股。小琴噚日睇《金融時報》引述一份諮詢報告話，原來舊年以管理層回購（Management Buyout）方式從美國退市嘅中國公司總規模達35億美元，多過中國公司係當地新上市（IPO）嘅總集資額（22億美元）喎。


出現咁嘅情况實在係罕見，因為就係1年前，民企風波尚未發生時，幾乎一單中國退市嘅個案都冇。2010年年尾優酷及當當兩間互聯網公司係紐約交易所掛牌，仲帶起另一輪中國科網公司上市潮，唔到1年嘅時間投資者對中國公司嘅態度已變晒，你話幾唏噓。


港交所隨時執到寶

不過正所謂禍福相依。2011年從美國退市嘅中國公司，大部分都係一年間股價大挫，未必代表佢地全部質素唔得。管理層買起佢地，都係唔想價值被低估，話唔定假以時日市場情緒平復，港交所或者可以成為佢地重新上市嘅地方呢！