中外財金猛人月中來港

【明報專訊】第5屆舉辦嘅「亞洲金融論壇2012」會喺月中舉行，同以往一樣繼續請來猛人出席，英國財政大臣歐思邦、匯控（0005）主席范智廉都會老遠喺英國飛過嚟擔任演講嘉賓，聞說前任匯豐香港區總裁馬凱博都有份出席，佢就當然係以貝萊德（BlackRock）亞太區主席嘅身分出席，唔知到時會唔會同前老細范智廉碰頭呢？小琴都相當期待。


馬凱博有份 見返范智廉

今次論壇嘅主題係「亞洲：推動持續增長」，亞洲之中又當然少不了強國中國嘅同胞啦！大會搵來內地有份量嘅嘉賓，好似朱鎔基之子、中金總裁兼首席執行官朱雲來，第一東方投資董事長諸立力都會現身撐場。


大會今次亦搵來上海市副市長屠光紹，不嬲香港同上海都爭住成為中國的頂尖金融中心，唔知到時會唔會擦出乜嘢火花呢？