新官傅成玉通英文 中石化睇實英語評論

【明報專訊】中石化（0386）舊年11月換咗老頂，前董事長蘇樹林調去福建當官，由中海油（0883）原董事長傅成玉接掌。小琴聽人講原來傅董識英文，搞到中石化上上下下喺新官上任之後，特別看重國際傳媒對中石化嘅報道同評語，因為知道老總識睇，即刻要打醒十二分精神。


傅成玉做中海油老頂期間，最令人印象深刻嘅當然係爭購美國油公司優尼科一役。雖然最後呢宗收購被美國政界阻撓而告吹，但已經反映傅董魄力過人，喺其他國企都未知乜嘢叫做走出去時，就提出呢單高達185億美元嘅併購。小琴翻查資料，05年底好多內地媒體都選佢做風雲人物。


大家都關心到底傅董過檔之後，中石化會唔會有乜嘢改變。最近中石化高調出手，拉埋新奧燃氣（2688）一齊向中國燃氣（0384）提出敵意收購，睇嚟亦係佢嘅傑作。能否收購成功，就要看下回分解。