中採聯與統計局爭PMI主權

【明報專訊】內地PMI（製造業採購經理指數）數據鬧出主權之爭，每個月都會公布中國最新PMI嘅中國物流與採購聯合會（中採聯）噚日罕有咁響自己網站發表聲明，否認PMI係由國家統計局調查再委托中採聯發布，強調PMI調查係由中採聯率先倡導發起。


中採聯之所以突然向統計局宣示PMI主權，源於上星期五國家統計局網站有篇新聞稿，其中「由國家統計局調查並委託物流協會發布的12月製造業採購經理指數顯示比11月有所回升」呢句，引起主權矛盾。


中採聯：統計局唔抵得我哋做得好

但更深層次嘅矛盾係，中採聯副會長蔡進話，統計局有人睇唔順眼佢地PMI數據做得好，所以搞小動作，蔡進仲話，之所以要出聲明澄清，係因為篇新聞稿出街後，唔少金融機構向佢哋提出質疑，擔心PMI係由統計局做會影響數據公正。


咁呢個被視為官方嘅PMI究竟係點製成？蔡進就解釋，係中採聯透過統計局渠道向企業進行問卷調查，問卷收集同統計由統計局處理，中採聯收到數據後進行分析同公布。