肉蒲團賺到笑

【明報專訊】金融圈才子蕭若元囝囝蕭定一做生意夠晒創意，好似中國3D數碼（8078）上年開先河拍咗套3D三級片《肉蒲團之極樂寶鑑》狂收4000萬港紙，成為上年港產片票房冠軍。不過，3D數碼噚日公布用五成折讓配股，嗰頭做票房冠軍，呢頭蕭定一就變相賣盤，持股量由兩成幾大幅攤薄到唔夠3%，蕭公子做生意，果然係估佢唔到。


3D數碼今次用每股0.08元配股集資2.35億元，個價同公布前個股價0.158元折讓49.37%，其中七成集資就係用嚟拍戲，其餘嘅就可能用嚟收購內地影院。3D數碼個股價噚日不但無跌，仲升咗15%。


配股集資 繼續投資電影業

小琴噚日都打過電話畀蕭公子，佢無聽電話。不過，蕭公子早排已經放晒聲氣話想再拍多兩套3D電影，仲搵埋「宇宙最強」嘅甄子丹同周秀娜助陣，要使幾多錢都仲未知，睇嚟今次真係要搵條大水喉嚟射住先得喎。