永亨75周年酒會 曾蔭權撐場

【明報專訊】永亨銀行（0302）啱啱75周年，周四晚搞咗個慶祝酒會，不過幾有創意嘅係，永亨會為每位出席嘅賓客捐300蚊畀公益金，名副其實係畀「人頭費」咁，當晚出席嘉賓超過800人，換言之永亨做善事捐咗最少24萬元。


以往呢啲酒會，出席嘅賓客都唔會兩手空空到場，不過永亨亦講明鼓勵各位賓客以捐款形式，代替禮品同埋花籃，令今次嘅慶祝酒會別具意義。


永亨已捐公益金最少24萬

永亨喺香港一向較為低調，但其實董事長兼行政總裁馮鈺斌都有不少公職，好似外匯基金諮詢委員會委員及其轄下金融基建委員會委員、香港旅遊發展局成員咁，所以連行政長官曾蔭權都出席撐場，認真畀面。不過小琴相信各位小股東最感興趣嘅，係永亨今年會否派特別股息呢？佢3月就會派成績表，大家一於拭目以待。