香港紅酒拍賣又創紀錄

【明報專訊】雖然小琴飲開百佳啲100蚊兩支嘅紅酒，不過絕對唔抗拒「觀望」名酒，只要見到有個連名都唔識點讀嘅世界最Top靚酒出場，都會忍唔住去望多兩眼。


自從上次去過全球最大名酒拍賣行Acker Merrall & Condit個拍賣會湊熱鬧之後，個公關姐姐就時不時send email過來同我匯報佢地啲新嘅名酒拍賣情况。噚日又收到消息，上個禮拜場佢地個香港拍賣會創下90.34%成交率，超過6686萬成交額，其中有12支原木箱裝Romanee Conti居然賣到差唔多150萬，加上另外3款經典酒刷新同款世界紀錄，小琴都想像到中國買主有幾咁錫啲酒啦。


大家都話紅酒會愈擺愈香，我覺得呢種投資都幾適合小琴呢啲比較驚蝕底嘅人：支酒升值就梗係好啦，不過就算價錢跌，都可以開開心心飲佢落肚。起碼任何時候都可以同自己講：一係有錢賺，一係有靚酒飲，點樣都着數！