瑞士保險公司：日本地震投保率偏低

【明報專訊】瑞士再保險（Swiss Re Group）噚日出咗份報告，專門列咗幾個經常發生地震嘅國家嘅保險覆蓋情况，發覺原來日本上一年大地震嘅經濟損失得17%由保險公司賠償，但係同樣經常發生地震、防範意識強好多嘅新西蘭個比例就去到80%。保險公司話，最近兩年全球地震造成嘅經濟損失有成2760億美元（大約2.24萬億港元），但係好多地震國家投保率偏低，搞到咁重大嘅損失都要政府同埋納稅人獨自承擔，真係雪上加霜。


小琴特登上天文台網站睇過，原來香港距離活躍地震帶頗遠，100年來都凈係有過幾十次微震，未試過引起任何傷亡，同日本台灣呢啲地震海嘯多發區冇得相提並論。計小琴話，真正嘅地震海嘯就未輪到香港，不過身為國際金融中心，大家可能應該齊齊買番份「金融海嘯特別保險」。