博時RQFII產品 自誇管理費平通街

【明報專訊】香港兩大超市經常被批評話有操控價格之嫌，其實各行各業都有類似情况，好似近排啲RQFII（人民幣合資格境外投資者）基金蜂湧面世，散戶好似一下子好多選擇。不過望真啲，喺阿爺嘅框架下，呢啲基金投資組合比重都大同小異，收費方面，證券商大部分收1.2%管理費一年，基金就收1.5%，基本上已經係「公價」。


賣點：百分百買債

不過，博時基金（國際）董事總經理趙小寶噚日就話，佢哋即將推出嗰隻「博時人民幣債券基金」，管理費每年收1%，比起佢啲基金行家收開嘅1.5%，價格相對「相宜」。趙小寶解釋，因為佢哋隻基金百分百用嚟買債，行家賣嗰啲就有小量股票，所以管理費可以收少啲喎。


負責呢隻基金嘅基金經理劉杰翔補充，基金百分百資金買債，係想定位清晰啲，等投資者知道佢哋係主打低風險收息產品，而唔係買債券賺完幾厘回報，轉頭喺A股蝕番。另外，華夏基金隻「華夏精選人民幣債券基金」今日起應市。