喜羊羊首日票房 打敗福爾摩斯

【明報專訊】內地本土動畫明星《喜羊羊與灰太狼》嘅第4齣電影《喜洋洋與灰太狼之開心闖龍年》近排喺內地上映。首日錄得2700萬港元票房，開映4日收入逼近1億元，成績相當唔錯。相比之下，同樣近排上映嘅《神探福爾摩斯2：詭影遊戲》，首日有1900萬人民幣（約2337萬港元）票房，小琴有啲估唔到：咦，咁靚仔嘅組合竟然都會輸畀啲羊羊同狼狼？


小琴八八卦卦咁上內地啲影評網睇番，喺一個叫「時光網」嘅網站，福爾摩斯得分有8.6，總體評價係「很好，公認的佳作」，而喜羊羊與灰太狼就得5.8，畀啲網友話係「平庸之作，不看也罷」。哈哈，睇來中國啲爸爸媽媽真係非常有犧牲精神，為咗小朋友開心，無論心入面點諗都要義無反顧行入影院，可能仲要一次過買3張飛，唔怪之得票房咁火爆啦。


大概一早就睇出中國小朋友帶來嘅強大需求，意馬國際（585）先會積極同喜羊羊合作，大力推廣佢啲相關產品。