中央智囊巴曙松 做細價股投資顧問

【明報專訊】中央智囊、內地經濟學者巴曙松（圖）再次投身金融界，將會成為專攻內地小額信貸之中國金融國際（0721）嘅首席投資顧問，任期一年。


其實今次都唔係巴曙松第一次響金融界發展，早年就喺中國銀行（3988）打過工，2001年仲擔任過中國銀行香港有限公司風險管理部助理總經理。直到2003年佢就任國務院發展研究中心金融研究所副所長，正式成為中央經濟智囊一員。


今次請得巴曙松再度出山，小琴都好奇中國金融國際開出嘅條件有幾好，事關巴曙松主要研究金融機構風險管理同金融市場監管，相信佢嘅經驗對呢隻細價股發展會有幫助。遠嘅唔講，就好似噚日咁，個消息傳出後，中國金融國際就升咗4%，報0.52元。