中燃4000員工撐管理層反收購

【明報專訊】自從新澳能源（2688）同中石化（0386）上年12月向中國燃氣（0384）提出收購之後，一場精彩嘅「收購戰」就即時打響。小琴噚日聽到最新消息，有4000幾個中燃員工，聯名簽署咗份反對收購嘅請願信，上呈咗畀公司董事會。啲員工就話，收購案會對公司嘅未來有「不利影響」，仲大力支持目前公司個管理層，讚佢哋「取得創紀錄財務業績」，而且相信現任管理層會係日後管理本公司嘅「最佳選擇」。


場收購風波到目前為止火藥味都算相當濃，不單止有股東爭先恐後咁增持股份，家陣連員工都加埋入來，更加熱鬧。話時話，小琴都覺得幾得意，平時好少聽講有公司員工公開「表白」話鍾意自己個老闆，如果封信真係員工自願簽署，咁中燃啲高層最近要為呢單收購早晚擔心嘅同時，話唔定都會時不時望住份簽名信偷笑。