新聞類別
財經
詳情#
【明報專訊】已經入主無綫嘅台灣女首富王雪紅，又再一次可以同老公陳文琦正式「並肩作戰」，噚日電視廣播（0511，無綫）宣布，陳文琦唔再擔任王雪紅嘅替任董事職位，並獲委任為非執行董事，兩公婆繼續拍住上。至於王雪紅替任董事一職，就由佢嘅投資顧問張孝威接手。
除咗呢個調動外，無綫董事局仲有其他大執位，首先呢，利孝和夫人會退任非執行董事，而佢個囝囝利憲彬就會接任非執行董事一職，每年董事袍金15萬。利孝和夫人擔任無綫董事已經超過30年，可以話係除咗邵逸夫爵士之外，利孝和夫人同無綫關係就最深，事關無綫首任董事局主席就係利孝和，直至佢1980年心臟病逝世，先至由大股東邵逸夫接任主席。
南豐太子女辭任非執董
至於另一個人事調動，就係南豐集團太子女陳慧慧辭任獨立非執行董事，佢2009年8月先至獲邀加盟，但過去兩年陳慧慧飽受爭產事件困擾，兩年前父母突然鬧離婚，隨後更遭母親楊福和以分配家產問題入稟狀告，去年底佢同親家姐陳慧芳亦都因財產問題要對簿公堂。
雖然今次無綫響通告入邊解釋，陳慧慧唔做非執董係因為「業務日益繁重」，但小琴就好奇，佢繁重嘅業務，會唔會同家族官司沒完沒了，與母姊反目有關呢。
email:piano@mingpao.com
回應 (0)
