經濟疲弱 細鑽價跑贏巨鑽

【明報專訊】小琴噚日有幸見到香港鑽石總會會長馬墉宜，梗係要把握時機關心吓啲鑽石抵唔抵買啦，儲到出嫁個陣就風風光光。唔問都唔知，聽馬會長話，原來鑽石個價格波動都「大細有別」。


細鑽價年升七成 巨鑽升四成

好似舊年咁，啲幾卡嘅大粒鑽石價錢就升咗三、四成，但啲幾分之一卡、多數拿來做裝飾嘅鑽石仔就反而升超過七成幾。問番個原因，原來係環球經濟唔好，花錢買大鑽石嘅富豪少咗，但學馬會長話齋，「啲女士唔會停止珠寶消費」，市面就因應佢哋嘅Budget，出多咗好多鑲咗細細粒鑽石嘅首飾，仲有啲商家運用顯微鏡技術逐粒雕琢，啲產品就算同大粒鑽石擺埋一齊都一樣光芒四射，加上成本同埋售價都低唔少，喺市面更加大受歡迎。


小琴最鍾意經過櫥窗個陣偷望啲珠寶首飾，對閃鑠嘅鑽石更加係冇晒抵抗力，自小就最羡慕啲珠寶商同設計師可以同鑽石日夜相對。聽業內人士講，香港啲大珠寶製造商同埋出口商老闆，竟然十個有九個都係男士。小琴心諗，要成功做女士生意，原來仲要識因應經濟環境、改變大細鑽石嘅使用比例，各位老細睇來認真有花過一番心思了。


email:piano@mingpao.com