建行新公關阿頭 來自新華社

【明報專訊】去年10月底內地三大金融監管機構既一場「音樂椅」式大換班，引嚟中外財金界嘅高度關注，其中建行（0939）原董事長郭樹清升任中證監主席成為京城裏一時佳話。不過，除咗建行最高領導層變動之外，原來佢哋嘅公共關係與企業文化部亦換咗掌舵人，總經理一職由原來該部門嘅副總經理王熾升任，而原總經理胡昌苗就調任廣西分行行長。


曾派駐香港3年

作為全球市值第二大銀行嘅公關部門領導，王熾要代表建行對外溝通發言，真係少啲功力都唔得。噚日王熾同建行黨委委員章更生及一眾建行高層來港舉行傳媒春茗，王熾就同小琴透露，原來佢做過新華社記者，仲派駐過香港3年，廣東話絕對難佢唔到，相信日後同香港傳媒加強溝通就更加方便。


小琴亦好關心「郭董」嘅去向，王熾話，郭樹清數月前離開建行前並無大搞歡送會，但臨別前就向員工發出內部電郵道別，字裏行間流露不捨之情。不過，正所謂天涯何處不相逢，更何况中證監總部同建行總行只相隔數百米，相信建行員工同郭樹清會時有巧遇嘅機會。